Tori say Chelsea winger wey be Willian don reject the club latest contract offer of two-year extension as e dey try hold out for three years own.
The Brazilian wey don dey for the club since 2013 go dey out of contract when season end and e don already dey oshofree to yarn with foreign clubs dem.
As e dey so the winger no gree look Chelsea latest offer and other clubs for the Premier League don already dey approach am.
Even though say im long-term future for Stamford Bridge no sure , the 31-year-old still continue to dey play ogbonge part for inside Frank Lampard squad dis season.
Willian don make 36 appearances for all competitions and e na him kolobi the opening goal for the Blues 2-0 kondo akpako nacking of Liverpool for the FA Cup fifth-round on Tuesday night.
